خلى بالك من ولادك…هما دول مالك وزادك
بقلم : سمير المسلماني
جائتني أمي في المنام… اتفردت جنبي ونامت
قالتلى فينك يابن ضهري حتي مستخسر زيارة او سلام.
قلتلها في الدنيا ياامى قالتلي دنيتكم خسارة
قلتلها مطحون ياامى في الرحايا
بجري جري الوحش فيها من صباحي ولمساية
قالتلى يابني عيش حياتك… ارض ربك وارض ذاتك
مش هينفعك الا عملك
اعمل الصالح تملي
يابني
صوم وصلي
خلي حسناتك تعلي
خلي ذكر الله تملي فوق لسانك
ادعي يابني في كل لحظة
مش عشاني …..لأ عشانك
ده الدعا هيعلي شانك
ما تلمس ايدك حرام
ولا يدخل جيبك حرام
بالحرام يابني بتضيق القبور
قلتلها طمنينى وانت فى قبرك
قالتلى يابني كله نور
قد ايه ربك رحيم
قد ايه ربك غفور
كنت رايحه له وشايل
فوق كتافي الف ذنب
بس كان جوايا قلب
ماعرفش الا يحب
ربنا رحمته اوسع
مما يتصور خيالك
ابتسمت في ضي وشها
وقولتلها دي مكتوبالك
ذديني ياامى في النصيحة
قالتلي هاقولها لك صريحة
اوعي يابني في مرة
تظلم
او تكون أداة لظالم
وانصف المظلوم تملي
خلي قلبك بيت مظالم
وصى ولادك
خليهم يابني يخلوا بالهم من امهم
زيها مايشلش همك
في رضاها السعد يابني
مهما تعلي ولا تبني
خلي بالك من ولادك
هما دول مالك و زادك
هما دولة امتدادك
قلتلها نفسي اجيلك
قالتلة كل شئ يابني بأوان
كل واحد له أوانه
بالمكان وبالزمان
قمت بايسهه فوق جبينها
ولمست بشوق عيونه
وصحيت م النوم بفرحة
شفت امى في المنام
من حلاوة الحلم نفسي
كل مااقوم تاني ….انام
