بقلم /سوزان محمد
عاشِق فى قلبى طَبّ
و احتار دليلى يا رب
يوم يعشقنى بجنون
يوم حد تانى حَب
يوم يعشقنى بجنون
يوم حد تالِت حَب
رابع و خامس حُب
آه يانا يادى الغُلب
و كأنه طفل كبير
قاعد يقزقَز لِب
و كأنه طفل كبير
و حلالُه مِنى الضرب
كل امَّا اقول انساه
قلبى ف هواه يِندَبّ
و عليه كلام فِ الحب
بِيشُقّ جُوَّا القلب
صادق فى كِدبُه يا ناس
فيه السلام و الحرب
لو شافنى زعِلت يوم
تِنزِل دموعه كَب
يحايلنى قبل النوم
مِ الرأس لِحَدّ الكَعب
عاشقاه و نار الغيرة
مَلِت حياتى كَرب
سألتُه إنت ازاى
قلبك مِسَكِّن شَعب
و منين راحة الضمير
يا خارِبها شرق و غرب
ضِحكِت عيونُه و قال
إنتى الحنان و القُرب
و أخدنى فجأة ف حُضنُه
و مسَح دموعى شُرب
قال أنا عاشق ترابِك
واصل لِآخرِ الدرب
إنتى الحقيقة و بس
و الباقى كِدب ف كِدب
بس انا صاحِب مزاج
و العشق غير الحُب
عاشْقِك يا حبيبتى لكن
أنا وقت ما احب احب…
