بقلم. : سوزان محمد
يا أطيب حب فى الدنيا
ما بيسيبنيش و لا ثانيه
بتشتاق منى حضن كبير
لو انت ف آخر الدنيا ..
و حبك ليا حاله خاصه
و باين حتى ف البصه
بتحضنى بنظرة عين
عيونك فيها مِيت قصه ..
و حبك أد كل الكون
و همى إنتَ بيه مسكون
و بتخاف مِ الهوا الطاير
عليا بقلب أب حنون ..
أمانى باحسه كله معاك
و أوجاعى أكيد واجعاك
و لو منتاش قَرِيب منى
بتسمعنى و باكون سامعاك !!! ..
حنانك مهما أوصف فيه
كلام الدنيا ما يكَفِّيه
دا حبك حب مِ الجنه
و مهما أعيش باعيش انا بيه ..
بَحِبَّك حب مش عادى
عشان حُبك ماهُوش عادى
دا حب الناس دا كله ف كوم
و حبك لِيا نا ف وادى ..
بافَتَّح عينى على حضنك
و اغَمَّضها و انا ف حضنك
و باتمنى انى طول اليوم
اكون حضناك و انا ف حضنك !!! ..
و حبيت شعرك الأبيض
بيشبه قلبك الأبيض
فى قلبك حب أد الكون
نهارى و لِيلى بيك أبيض ..
عشان قلبك دا قلب مَلاك
و كل الدنيا ديَّا لُولاك
ماتسواش عندى و لا حاجه
هاعيش و استَنى بس لُقاك
