د.سعاد الفضلي
من جبتْ طاري الحزنْ صابني شعورْ
ذكرتني بالمضى
مِنْ ضيمْ دنيايْ
رحتْ البلد بيه ناس وبعيني مهجورْ
مجبورة أنا طلعت
يسبقني دمعايْ
حب الوطنْ والأهلْ
بالقران مذكورْ
أنا ترى هاجرتْ مجبورْ
مو للونسْ جاي
كل كعدة تحتْ النخلْ
ويم الأهل مسرور
تسوى الف عاصمة
بكل المدنْ هايْ
لفييييت, حتى تعبت
ما ظل بلد لازورْ
ما يغني عن جلستي
عند ضفة الماي
ما ريد(ن) يطول
الغيم ويغًم الشعورْ
وهم الثلج من يجي
يتصارع ويايْ
بلادي فيها الاملْ والشمسْ,, والنورْ
تغتال كل الحزنْ
وتنسيني دنيايْ
ابكي حزنْ مو فرحْ
مِنْ تعودْ الطيور
ترجع للوطنْ وتقولْ
ليشْ إنتَ مو جاي؟!
ما يدري هل الطير
شكدْ قلبي مكسورْ
لما يجي,, ويروح,,
بس يسمع ابجاي
وأنا أظل مربوط
بوهم وكأني منذور
ومن كثر ما ونييييت كرهتني دنياي
كل من يشوف الشكلْ
يتصور غرورْ
ما يدري كل هالحزن
قد شللّي اعضاي
يمته يكون الوطنْ
عند ظني منصورْ
ويرجعْني خالي همومْ
من كل بلواي
حار الطبيب شلون
يوصفْ المحظورْ
ما عادْ ينفعْ بعدْ
كل علْتي بدوايْ
صرتْ مرةْ مثلْ النومْ
لو هاجمْ الناطورْ
يقول خل السهر عنك
و نام وياي
كل ما يحيط(ن) بيك
من زهرْ وعطورْ
ما ظنه يغريك
جنب شربة المايْ
وشكد يطولْ البعدْ
عنك يا مغدور
تبقى تتصارع دوم مع ذاك(ن) و هاي
ما اقدر انا يطول همي سنين ودهور
كل ما اطلبه منك!
مرة توقف معاي
أنا بالبعد عنك
وكاني مبتورْ
ما تقدر تشيل الهم
فد يوم وياي؟؟
هاي احنا نعاني
سنين ودهور
وراح العمر فدواك
كدْ شربةْ الماي
وانا بعد ما عانيت
كل هذي االعصورْ
شأكلك يا وطن!!!
ما قصرتْ مشكورْ
