كتبت هند المنشاوي
الست المطلقه مش أوضة نوم
والست ال بتدخن مش شمال
و ال بتسافر لوحدها مش قليلة أدب
ومعندهاش اهل يلموها ويربوها
و ال لسه متجوزتش مش صايعة و مقضياها
ومش كل واحدة مغطية شعرها محترمة
ومش كل واحدة كاشفة شعرها
ماشيه على حل شعرها وصايعة
كفايه حكم على الناس من الظاهر
كل بنت او ست ليها ظروفها
في ستات شايله مسؤليه تهد جبال
انت ياراجل متقدرش تشيلها أو تتحملها
في ستات جواها كتير ومبتشتكيش متبقاش الدنيا ظلماها وتيجى انت تكمل عليها بحكم
سطحى جاهل تافه
تعرف انت ايه عن تفاصيل حياتها عشان تحكم عليها ؟
انت لو عرفت قد ايه المعاناه ال بتعانيها
والظروف ال مرت بيها في حياتها
هتستحقر نفسك من ظلمك وحكمك عليها بالباطل
انت نفسك لو مكانها هتغرق ف شربة ميه
في حكايات وظروف تتعب نفسيا
بصراحة ومن قلبى ربنا يقوى و يحمى كل ست
شايلة الهم و ساكتة ولا بتتكلم ولا بتشكي
ف ياريت ال عنده كلمه حلوة يقولها الى معندوش يسكت
مش لازم دايما نحط التاتش بتاعنا ونعمم فى كلامنا عشان اغلبية الستات دلوقتى مطحونين حرفيا
ومحدش حاسس بيهم ولا مقدر
حتى كلمة شكرا مبتسمعهاش
ف متجيش انت بقى تزودها
وتحكم عليهم ب تفكيرك العقيم الشمال
من الاخر عايزة اقول ال بيته من ازاز ميحدفش الناس بالطوب كل انسان يخليه ف وكسته و يركز فى حياته
و كفايه حكم على البني ادمين
بتفكيركم العقيم ونيتكم الزبالة
