بقلم عادل القليعي .
أستاذ الفلسفة الإسلامية.
بآداب حلوان.
معلش سامحوني هتكلم المرادي باللغةالدراجة، لأني هكلم الكل، المثقف، الإنسان العادي إللي بيفك الخط بالعافية، هكلم كل الناس.
أول حاجة كده، نصلي علي الزين، عليه الصلاة والسلام، واحنا داخلين علي العام الجديد ما نقلش كل سنة لأن السنة جاتت في القرآن مع القحط والجفاف والعجف، بس ممكن نقول كل عام،لأن مع العام يجيي الفرج، اتفقنا ولا أقوول كمان.أول حاجة أهي.
وكمان عارف كويس جدا إن ربنا جعل لينا عيدين فى الإسلام ، لكن إيه المانع إننا نقول لبعض كل عام وانتوا طيبين ، ما كل يوم يجيي علينا وأحنا بخير فهو عيد.
والحاجة التانية، نخدها وحدة وحدة، نبدأ من البيت، إيه الحكاية بقت سلطة سداح مداح، الراجل يا ولداه مطحون في كام شغلانة عشان يجيب المم ومصاريف الشهر إللي بتتفرتك قبل ما بياخدها، ماشي، طب وأنتي يا حجة، يا هانم يا مدام مشغولة في إيه، وسايبة ولادك كده كل واحد في ناحية بيعمل اللي هو عايزة، آه مشغولة النهار كله في عمل شعرك وضوافرك وبروكتك، ولا مشغولة ليل نهار في النت والشتات والفيس وسايبة بنتك تعمل إللي عايزة ليه، طبعا مش الكل كده.
أو مشغولة النهار كله في المطبخ بتعملي المشمر والمحامى وأنواع الأكل والشرب ، يالا افرحي أهي قفلت لا هيبقى فيه أكل ولا شرب ، انتبهي بقى لعيالك.
ليه ما تتابعوش ولادكم راح فين وجه منين، ليه ما تعلمهمش طريق ربنا والصلاة والعبادة، مش دوول برضه مسؤولين منكم، ليه ما تتابعهمش في المدرسة والجامعة شفوها ماشية مع مين وبتقعد فين وبتتأخر ليه، أنا ما بقولش أنكم تعملوا كده عشان فاقدين الثقة فيها وفيه، لكن المتابعة والمصاحبة ليهم بدل ما يصاحبوا ولد خربان ولا بنت فسدانه وبعد كده نقول ألحق يا ولد يا ريت إللي جري ما كان.
إيه حكايتكو فوقوا بقي، ولا عاوزينهم يطلعوا بلطجية وبتوع مخدرات ولا يقفوا النهار كله يعاكسوا في البنات في الشوارع، ده هيمسك فيكم يوم القيامة ويقول لربنا هات لي حقي منهم خلفونا ورمونا للديابة، أو يمسكوا فيكم ويبهدلوكم ويضربوكم.
والحاجة التالتة، كله بيهري كله بيفتي كله بقى بتاع سياسية، كله بقى عالم دين، كله بقى عالم نفساني، كل بقى بتاع إجتماع تقعد علي القهوة تسمع العجب والغريب والطريف، يقلبولك الدنيا ويعدلوهالك في ثواني، يا راجل أنت وهو بطلوا بقي وسيبوا الناس تشتغل وبطلوا وجدع دماغ واشتغالات.
والحاجة الرابعة،إيه اللي حصل لينا، إيه التخبط ده، ما هذه اللخبطة والشغبطة اللي حاصلة لينا.
الحق اتقلب باطل، والعكس الباطل اتقلب حق
الخير أصبح شرا والعكس الشر بان للناس خيرا.
في إيه الجميل صار قبيحا، والقبيح زينه الشيطان مليحا وجميلا.
أوعى حد يقول لغة العصر والزمان أتغير
ما تعيبوش على الزمن ولكن عيبوا على أنفسكم لأننا إحنا اللي بنعمل الزمان.
ليه حصل تدن للقيم والأخلاق،ليه أصبحنا مش طايقين بعضنا، ليه كل واحد بيقول يالا نفسي
ليه الواد يمد ايده علي أبوه وأمه، ويمضي أمه بالإكراه إنها تتنازل لمرآته عن كل ماتملك.
قال مرآته مرآته في عينه قليل الحيي يضرب أمه عشانها، خيبة الله عليك، وخيبة الله عليك إنتي إللي خليتيه يعمل كده.
والصراحة العيب في الكل زي ما كنت بقول في أول كلامي.
ليه استبحنا المنكر ورأيناه حللا، وتركنا المعروف وصنعه.
ليه دايما ما بنسمع قول وأنا مالي
يا أخي أماااال مال مين، ما لو كل واحد قال وأنا مالي، يبقي خربت وهنقوووول ع الدنيا السلام.
مالكم تشوفوا الغلط وتسكتوا ليه، ليه نشوف المنكر أمامنا ونعمل نفسنا مش شايفينو،
والحجة ربنا هو اللي هيحاسبهم،
ماشي بس إحنا وكلاء الله في الأرض
حتي ولو بأضعف الإيمان.
ليه نشوف البنات في الشارع لابسه مش لابسه ونسكت، ليه بنشوف المسخرة بين البنات والولاد في كل مكان ونقووول إحنا مالنا خلينا في حالنا.
ماهو حتي لو هتخليك في حالك ماهو أنت عايش في هذا المجتمع والزحف الحضاري(المدنية الحديثة) هههههههههههه، هيدهس بيتك.
ما ينفعش نسمع هؤلاء المتطفلون علي الفن،ونسكت، نسمع من ينشذ من منخاره، واللي بيرقص كرشه، واللي لابس أبصر إيه ولابسه إيه، ونسكت
ما ينفعش نشوف دووول ونسكت، زمان كان المسلسل أو الفيلم يعالج قضية مهمة، أريد حلا مثلا لسيدة الشاشة ،بداية ونهاية،وغيرها من الأعمال الرائعة،
تعالي دلوقتي اتفرج علي فيلم كده تصاب بالغثيان، أما قصة حب فاشلة تنتهي باشاعة الفوضي والفحشاء والزواج العرفي.
أو شوية عصابات بيخبطووا في بعض ويطلع رامبو أبو عضلات أو يطلع ابو سنجة العريان يقبض عليهم، إيه الدهوله والخيابة ديه.
إيه الخراب اللي حل ده، يعني ما ينفعش نكسب فلوس من أعمال محترمة أعمال فنية محترمة،
ما كان زمان بيكسبوا بس بيقدموا مادة فلمية قصة محترمة نستفيد منها.
وتعالوا شوفوا شوية الرقاصين والرقاصات اللي بيسموا نفسهم مطربين، انتو مطربين لا والله دانتو مطرمين، طرمتوا ودانا واصابتونا بالتلوث السمعي والبصري بمناظركم المتخلفة دية.
كفاية بقي حرام عليكم ارحمونا دا لو مطربين الزمن الجميل عادوا من قبورهم لضربوكم بالبلغ والمراكيب القديمة ومش كفاية عليكم.
عيب إحنا بلد محترم حضارته عريقة، ماينفعش يتصدر المشهد البيكا والايكا والفلفل والشطة والشاكوش والكماشة،وبتاع الكشري وانتش وأجري.
الله يرحمك يا ست أنت وحليم والأطرش وفوزي، والموجي وبليغ والسنباطي، طبعا مش الكل كده.
يا أهل الفن الحقيقي ساكتييين ليه مالكم إيه إللي جرالكم
يا جماعة الرزق بتاع ربنا وماحدش بيمووت من الجوع، فين الحجار، فين الحلو بتاع الحلو، بتاع يا حبيبي كان زمان طلعت الورد بأوان، فين عراف وداير أنا والحاجات الحلوة، فين شاكر، فين وفين وفين.
ما ينفعش صوت واحد يهاتي، لازم كل الأصوات تصدح وتغرد مع بكر ما تسيبوهوش يهاتي لوحده فوقوا بقي يا أهل الفن الجميل.
ما ينفعش نسكت اكتر من كده
ياجماعة السكوووت علي هؤلاء جريمة يحاسب عليها الضمير.
معلش تركت لغتي العربية وتكلمت هكذا، لكن بصراحة لو سكت اكتر من كده هيحصل لي حاجة، زي ما قلت في الأول.
أصبت بالسكري والقولون العصبي، وداخلين علي الضغط، نلحق الشوية الباقييين من صحتنا.
ونفضفض ولا كمان الفضفضة ممنوعة.
أعوذ بالله اتخنقنا والله.
كل ماتمشي في مكان في أي حتة ما فرقتش امكان راقية أو شعبية الأغاني هيا هيا ،والوشوش هيا هيا،والمنتج الغبي هو هو
أقووووول كمان ولا كفاية.
ارحمونا، ألحقونا قبل ما تضيع عقولنا، مش كده ولا إيه، علي رأي العم فؤاد المهندس، والخال الأبنودي والجد الشيخ إمام ومعه نجم النجوم.
الله يرحم زمان وليالي زمان، ويرحمك يا عم عبد المنعم مدبولي.
أتمني العام الجديد يكون عام خير وسعادة لنا جميعا ولامتنا العربية وللعالم أجمع.
